четверг, 27 декабря 2012 г.

Боғимайдонда Янги йил арафисидаги хайрия тадбири


Самарқанд шаҳридаги Боғимайдон-2 маҳалласида фаолият юргизаётган хусусий тадбиркор Шуҳрат Ҳабибов Янги йил арафисида кам таъминланган  18 та оилага совға-салом улашди.

Ушбу маҳаллада кам таъминланган, боқувчисини йўқотган оилалар ҳолидан хабар олиб туриш, уларни маънавий ва моддий жиҳатдан қўллаб-қувватлаш яхши анъанага айланган. Айниқса, турли байрамлар арафасида меҳрга ташна кишиларнинг уйига бориб, икки оғиз ширин сўзу совға-саломлар билан улар кўнглини кўтаришни  маҳалла фаоллари ўз бурчлари деб билишади.
“Маҳалламизда ўз боқувчисини йўқотган, кам таъминланган ёки аъзоларидан бири ногирон бўлган оилалар ҳол-аҳволидан мунтазам хабар олиб туришга ҳаракат қиламиз, – дейди маҳалла оқсоқоли Мирзо Саидмуродов. – Масалан, фақат  кейинги икки ойнинг ўзида икки марта – Қурбон ҳайити ва Халқаро ногиронлар куни муносабати билан ушбу хонадонларда бўлиб, совғалар улашдик”.
Албатта, бундай хайрия ишлариги маблағ зарур. “Бу томони қандай бўлаяпти?”, –  деб сўраганимда, М.Саидмуродов маҳалла фуқаролари орасида бағрикенг кишилар, ўзгаларга, айниқса, муҳтожларга ёрдам қўлини чўзишга тайёр турган тадбиркорлар мавжудлигини фахр билан гапириб берди. Суҳбатдошим ака-ука Нуриддинов, Аслиев, Қосимов, Тўлабоевлар  ҳамда  Ҳожиқурбон Зубайдов, Тоҳир Ашуров, Умед Шодиев, Мўсин Ҳакимов ва бошқа ана шундай ориятли, маҳалладошларига меҳр улашаётганлар номини тилга олиб ўтди.
Янги йил арафасида эса хусусий тадбиркор Шуҳрат Ҳабибов кам таъминланган оилаларга совға-салом улашиш ташаббуси билан чиқди. Маҳалла фуқаролар йиғини бу ташаббусни қўллаб-қувватлади. Ушбу хайрия тадбири натижасида 18та оила ўз байрам дастурхонларининг янада кўркам бўлишига эришишди. “Қўли очиқнинг – йўли очиқ, деган нақлни эшитганман, – дейди Шуҳрат. – Шу сабабли хайр-саховат қилиб туришни ўз бурчим деб биламан”.
Юртимиз ободлиги ва ундаги ўзаро тотувликнинг муҳим гаровларидан бири айнан ана шундай саховатпешалигу юртдошларимиз орасидаги меҳр-муҳаббат эмасми?!
  
Тошпўлат Раҳматуллаев

Комментариев нет:

Отправить комментарий