четверг, 10 мая 2012 г.

Кўҳна маҳалланинг янги маркази


Самарқанднинг кўҳна маҳалларидан бири бўлган Сўзангаронда ҳашар йўли билан обод этилган маҳалла маркази ва Иккинчи жаҳон урушида ҳалок бўлганлар хотирасига ўрнатилган лавҳанинг   очилишига бағишланган маросим бўлиб ўтди. 9 май – Хотира ва қадрлаш куни ташкил этилган ушбу тадбир қутлуғ байрам тантаналари билан қўшилиб кетди.

Ҳар бир хонадон ва кўча саранжому саришта бўлганда маҳалла обод бўлади. Маҳалла ободлиги эса, мамлакат ободлигининг асосина ташкил этади. Бу ҳақиқатни чуқур англаган Сўзангарон маҳалла аҳли баҳорнинг илк кунларидан бошлаб маҳалла марказини обод этишга киришишган эди. Чойхона қайта таъмирланди, унга туташ йўлакларга чиройли плиталар ётқазилди. Дид билан қурилган янги фаввора маҳалла марказининг ҳуснига ҳусн қўшиб турибди.

Аҳил маҳалладошлар Иккинчи жаҳон урушида ҳалок бўлганлар хотирасига бағишланган лавҳани бошқа жойга кўчириб, уни янгилашни ўз олдларига мақсад қилиб қўйишган эди. Чунки бундан кўп йиллар олдин ўрнатилган лавҳа кўримсиз ҳолга келиб қолган эди. “Келажагимиз ва тинчлигимиз учун жон фидо этганларни қанчалик эъзозласак арзийди, – дейди маҳалла оқсоқоли Аслам Шукуров –. Уларга бўлган ҳурмат ва эҳтиромимиз намунаси сифатида хотира лавҳасини янгиладик ва барча учун кўринарли жойга ўрнатдик”.      

Маҳалладан Иккинчи жаҳон урушида 41 нафар киши қатнашган, улардан 13 нафари жангларда ҳалок бўлаган. Қайтиб келганларнинг аксарияти айни пайтда оламдан ўтган. Орамизда ўша суронли йилларнинг гувоҳи бўлган икки нафар отахонимиз қарилик гаштини суришмоқда. 91 ёшли Абдуғаффор Муқумжонов ва 86 ёшли Шариф Усмонов  маросимда иштирок этиб, суронли йилларни эсга олишди ва бугунги тинчликнинг қадрига етишга, аҳил ва бир оиладек бўлиб яшашга даъват этишди.

Тадбирда маҳалла аҳли номидан сўзга чиққан профессор Хуршид Самибоев, халқ таълими фахрийси Иброҳим Раупов ва бошқалар уруш қатнашчиларининг Ватан олдидаги жасоратини хотирлаш ҳам фарз ва ҳам қарз эканлигини, уларга бўлган ҳурматимизни мунтазам намоён этишимиз инсоний бурчимиз эканлигини уқтиришди.

Тадбирнинг янада файзли бўлишида санъаткорларнинг ҳам катта хизмати сингди. Тожикистонда хизмат кўрсатган артист Асатулла Отауллаев, Абдулла Қодирий номидаги Тошкент давлат маданият ва санъат инстути 3 курс талабаси Зулфия Рашидова ва хушовоз хонанда Азим Қувондиқов ўзларининг чиқишлари билан йиғилганлар кўнглини хушнуд этишди.

Тошпўлат Раҳматуллаев   
  

Комментариев нет:

Отправить комментарий